三度成為導盲犬寄養家庭 母女同心:牠有偉大使命


^Mabel與女兒Anson均對導盲犬靚靚寵愛有加。

不少家庭都有養狗,有些人更會與狗隻大被同眠。Mabel和女兒Anson也有養狗,但這隻狗「唔准上梳化、唔准上床、唔准 (有人) 攬住瞓」,亦總有一天會離開她們,與其他人一起生活 -- 這隻狗是導盲犬。

「靚靚,come come!」1歲多的導盲犬「靚靚」聽到Mabel的叫聲,便走過去依偎在她腳旁,又用舌頭舔女兒Anson的臉。

Mabel三度成為導盲犬寄養家庭,現在寄養的導盲犬靚靚,將於今個月配對給視障人士。離別在即,Mabel坦言不太擔心Anson會感到傷心,因為Anson明白牠肩負著一個偉大的使命,想到牠能夠成為真正的導盲犬,幫助視障人士,大家都會因此而感到驕傲,甚至希望能在街上看到牠們戴上導盲鞍,正在執行任務的醒目樣。而自從成為寄養家庭後,Anson與多隻導盲犬的關係均亦師亦友,變得更樂於助人及有責任感,令Mabel都意想不到。


^靚靚就快要進行配對,成為真正的導盲犬,大家都好唔捨得佢。

本身很喜歡小動物的Mabel,原本家裡已飼養了2隻貓,由於是全職家庭主婦,女兒Anson上學後,她覺得時間頗鬆動,所以也考慮飼養多1、2隻寵物,後來她得悉有導盲犬寄養家庭的計劃,可以親自照料牠們之餘,更多了一份使命感,於是在2015年,首次成為導盲犬寄養家庭,照顧當時只有2.5個月的導盲犬BB-Gaga。


^戴上導盲鞍的靚靚,即時變得嚴肅又認真。

「嗰次我同丈夫及女兒到機場接Gaga,可能有點水土不服,第二天已經要睇醫生。之後一次在街上遇上馬拉松比賽,牠竟突然在馬路上大解,一班警察見到我誤會咗我係視障人士:『佢盲嫁!』,仲封咗一條行車線俾我清理;另一方面,當時Anson只係讀緊幼稚園,不停大嗌執poo poo執poo poo,情況好混亂但又好好笑。」

女兒幫手為導盲犬解畫

^Anson為第一隻寄養的導盲犬Gaga所畫的作品。

Mabel又說,2、3年前導盲犬仍然未被市民廣泛接納,多得Anson經常幫手解畫。「我哋住沙田區,所以經常會去市中心的大型商場,有時Anson想去玩具店或者書局,我拖埋Gaga入去,間中會受到一些奇異目光或者阻攔,好似當咗導盲犬係恐龍咁!呢個時候Anson就會大聲同佢哋講,呢隻係導盲犬嚟嫁。由小朋友把口講出嚟,我覺得特別有說服力。」


^Anson經常同靚靚打成一片。

導盲犬寄養分為兩個階段,細B (2至14個月大) 寄養至14個月大後,就會再轉到另外一個家庭寄養,至20個月大便會回到訓練中心做配對,犬隻將會被分配給適合的視障人士。寄養期間要轉換家庭,是因為避免導盲犬在同一個家庭生活太久,會產生感情。

Gaga來到Mabel這個寄養家庭1年左右,協會幫忙寄養家庭與導盲犬過渡分離,例如安排導盲犬一整晚不回家,以觀察寄養家庭及導盲犬的情緒變化。而Gaga第一晚不在家的晚上,Anson就哭著要找Gaga。



^已經成為正式導盲犬的Gaga(左),間中會到Mabel家作客,與靚靚(右)相處融洽。

Mabel稱:「呢類情況,通常小朋友會較大人更加難過及不捨。但我哋會同小朋友一同面對,等佢知道導盲犬其實肩負偉大任務,而唔係做我哋寵物咁簡單,再者,大家仍然有機會經常見面及聚會,所以真的不用太傷感。」

因導盲犬帶來正面轉變


^Anson與靚靚互相陪伴著對方,一起成長。

「能夠同Anson一同見證曾經寄養在我哋屋企的狗狗成為導盲犬,我們全家都覺得好榮幸!而無論是Gaga、已成為導盲犬犬種的Ivy,還是即將進行配對的靚靚,Anson都好愛鍚牠們,平時都由她吹哨子著牠們進食,一同玩、一同跑步跳繩,又會在街上向途人解釋何謂導盲犬;有時狗狗又會陪Anson做功課、彈琴。彼此陪伴對方,一同成長。」

另外,女兒亦因為導盲犬的出現,主動幫媽媽完成購物的任務。「嗰時Gaga剛到我家,一次我拖著牠與Anson外出,打算買面包及沐浴露之類,Anson見我手忙腳亂,就主動幫我將物品拿給收銀員,當下覺得女兒真的成長了不少。」

家的感覺成長


^一家人落力訓練靚靚,希望牠能成為出色的導盲犬。

訓練導盲犬跟訓練寵物不同,因為導盲犬是工作犬,有一些規矩牠們必須要遵守。「做導盲犬寄養家庭時間要充足,無論是在職人士或家庭主婦都適合,最重要是多陪伴牠們,例如做社會訓練,要多帶牠們上街及乘搭交通工具;另外,導盲犬是不能亂摸或亂餵食,以及不可以上床或者梳化,這些方面,寄養家庭都必須配合協會。」

將大部份心思花在導盲犬身上,到底女兒有否向媽媽投訴被忽略?「其實不會,因為Anson上學的時候,靚靚也有可能要上堂,一般早上9、10點,上堂至下午4、5點;遇著星期六Anson要上興趣班但靚靚不用上課,很多時我們都會拖埋靚靚一齊去上堂的地方,中心職員都好歡迎靚靚前往。反而我成日話靚靚最乖,Anson唔乖,這時Anson就會坐在我同靚靚中間抗議,話我偏心,但其實大家都明白係講笑性質居多,而她心入面也是很喜歡靚靚的。」

Gaga來到這個家庭時,Anson曾經做過一本導盲犬日記,雖然只做了100日,沒有全部記錄下來,但已足夠母女二人經常拿出來翻看再翻看:「我當時亦同Anson講,我哋唔可以留Gaga在身邊,但呢本記憶是一世的,當時只係幼稚園學生的Anson,在日記裡寫咗唔少句子,真係好用心好難得。」

鍾意Gaga多過靚靚?


^Anson為Gaga製作的導盲犬日記。

經歷養育3隻導盲犬,問Anson最鍾意邊一隻,她總是答Gaga,彷彿靚靚地位是比不上的,但事實上Gaga是BB階段已開始由她們照顧,靚靚1歲多才抵步,感覺是截然不同。「Anson嗰時只係讀幼稚園,Gaga又係BB,所以2個好似一齊成長咁,加上係第一隻寄養的導盲犬,回憶特別多,後來佢配對咗成為視障跑手Gary Leung的導盲犬;至於靚靚都好乖嫁,Anson成日都同佢攬頭攬頸,只係以往湊Gaga的感覺太深刻。無論如何,希望靚靚將來都好似Gaga咁出色。」

Anson謂:「其實我都好鍾意靚靚嫁,知道佢就快要離開呢個屋企,我都會唔捨得佢,但我唔希望佢因為唔捨得我哋而返嚟,因為佢有一個很偉大的任務要完成,就係要做一隻出色的導盲犬,幫助視障人士。」